حيدر بابا

حيدر بابايا بير سلام

(١ )

حيدربابا ، ايلديريملار شاخاندا

سئللر ، سولار ، شاققيلدييوب آخاندا

قيزلار اوْنا صف باغلييوب باخاندا

سلام اولسون شوْكتوْزه ، ائلوْزه !

منيم دا بير آديم گلسين ديلوْزه

(٢)

حيدربابا ، كهليك لروْن اوچاندا

كوْل ديبينَّن دوْشان قالخوب ، قاچاندا

باخچالارون چيچكلنوْب ، آچاندا

بيزدن ده بير موْمكوْن اوْلسا ياد ائله

آچيلميان اوْركلرى شاد ائله

(٣)

بايرام يئلى چارداخلارى ييخاندا

نوْروز گوْلى ، قارچيچكى ، چيخاندا

آغ بولوتلار كؤينكلرين سيخاندا

بيزدن ده بير ياد ائلييه ن ساغ اوْلسون

دردلريميز قوْى ديّكلسين ، داغ اوْلسون

(٤)

حيدربابا ، گوْن دالووى داغلاسين !

اوْزوْن گوْلسوْن ، بولاخلارون آغلاسين !

اوشاخلارون بير دسته گوْل باغلاسين !

يئل گلنده ، وئر گتيرسين بويانا

بلكه منيم ياتميش بختيم اوْيانا

(٥)

حيدربابا ،‌ سنوْن اوْزوْن آغ اوْلسون !

دؤرت بير يانون بولاغ اوْلسون باغ اوْلسون !

بيزدن سوْرا سنوْن باشون ساغ اوْلسون !

دوْنيا قضوْ-قدر ، اؤلوْم-ايتيمدى

دوْنيا بوْيى اوْغولسوزدى ، يئتيمدى

(6)

حيدربابا ، يوْلوم سنَّن كج اوْلدى

عؤمروْم كئچدى ، گلممه ديم ، گئج اوْلدى

هئچ بيلمه ديم گؤزللروْن نئج اوْلدى

بيلمزيديم دؤنگه لر وار ،‌ دؤنوْم وار

ايتگين ليك وار ، آيريليق وار ، اوْلوْم وار

(7)

حيدربابا ، ايگيت اَمَك ايتيرمز

عؤموْر كئچر ، افسوس بَرَه بيتيرمز

نامرد اوْلان عؤمرى باشا يئتيرمز

بيزده ، واللاه ، اونوتماريق سيزلرى

گؤرنمسك حلال ائدوْن بيزلرى

(8)

حيدربابا ، ميراژدر سَسلننده

كَند ايچينه سسدن - كوْيدن دوْشنده

عاشيق رستم سازين ديللنديرنده

يادوندادى نه هؤلَسَك قاچارديم

قوشلار تكين قاناد آچيب اوچارديم

(9)

شنگيل آوا يوردى ، عاشيق آلماسى

گاهدان گئدوب ، اوْردا قوْناق قالماسى

داش آتماسى ، آلما ،‌ هيوا سالماسى

قاليب شيرين يوخى كيمين ياديمدا

اثر قويوب روحومدا ، هر زاديمدا

(10)

حيدربابا ، قورى گؤلوْن قازلارى

گديكلرين سازاخ چالان سازلارى

كَت كؤشنين پاييزلارى ، يازلارى

بير سينما پرده سى دير گؤزوْمده

تك اوْتوروب ، سئير ائده رم اؤزوْمده

(11)

حيدربابا ،‌ قره چمن جاداسى

چْووشلارين گَلَر سسى ، صداسى

كربليا گئدنلرين قاداسى

دوْشسون بو آج يوْلسوزلارين گؤزوْنه

تمدّونون اويدوخ يالان سؤزوْنه

(12)

حيدربابا ، شيطان بيزى آزديريب

محبتى اوْركلردن قازديريب

قره گوْنوْن سرنوشتين يازديريب

ساليب خلقى بير-بيرينن جانينا

باريشيغى بلشديريب قانينا

(13)

گؤز ياشينا باخان اوْلسا ، قان آخماز

انسان اوْلان بئلينه تاخماز

آمما حئييف كوْر توتدوغون بوراخماز

بهشتيميز جهنّم اوْلماقدادير !

ذى حجّه ميز محرّم اوْلماقدادير

 

(14)

خزان يئلى يارپاخلارى تؤكنده

بولوت داغدان يئنيب ، كنده چؤكنده

شيخ الاسلام گؤزل سسين چكنده

نيسگيللى سؤز اوْركلره دَيَردى

آغاشلار دا آللاها باش اَيَردى

(15)

داشلى بولاخ داش-قومونان دوْلماسين !

باخچالارى سارالماسين ، سوْلماسين !

اوْردان كئچن آتلى سوسوز اولماسين !

دينه : بولاخ ، خيرون اوْلسون آخارسان

افقلره خُمار-خُمار باخارسان

(16)

حيدر بابا ، داغين ، داشين ، سره سى

كهليك اوْخور ، داليسيندا فره سى

قوزولارين آغى ، بوْزى ، قره سى

بير گئديديم داغ-دره لر اوزونى

اوْخويئديم‌ : « چوْبان ، قيتر قوزونى »

(17)

حيدر بابا ، سولى يئرين دوْزوْنده

بولاخ قئنير چاى چمنين گؤزونده

بولاغ اوْتى اوْزَر سويون اوْزوْنده

گؤزل قوشلار اوْردان گليب ، گئچللر

خلوتليوْب ، بولاخدان سو ايچللر

(18)

بيچين اوْستى ، سونبول بيچن اوْراخلار

ايله بيل كى ، زوْلفى دارار داراخلار

شكارچيلار بيلديرچينى سوْراخلار

بيچين چيلر آيرانلارين ايچللر

بيرهوشلانيب ، سوْننان دوروب ، بيچللر

(19)

حيدربابا ، كندين گوْنى باتاندا

اوشاقلارون شامين ئييوب ، ياتاندا

آى بولوتدان چيخوب ، قاش-گؤز آتاندا

بيزدن ده بير سن اوْنلارا قصّه ده

قصّه ميزده چوخلى غم و غصّه ده

(20)

قارى ننه گئجه ناغيل دييَنده

كوْلك قالخيب ، قاپ-باجانى دؤيَنده

قورد گئچينين شنگوْلوْسون يينده

من قاييديب ، بيرده اوشاق اوْلئيديم

بير گوْل آچيب ، اوْندان سوْرا سوْلئيديم

(21)

عمّه جانين بال بلله سين ييه رديم

سوْننان دوروب ، اوْس دوْنومى گييه رديم

باخچالاردا تيرينگَنى دييه رديم

آى اؤزومى اوْ ازديرن گوْنلريم !

آغاج مينيپ ، آت گزديرن گوْنلريم !

(22)

هَچى خالا چايدا پالتار يوواردى

مَمَد صادق داملارينى سوواردى

هئچ بيلمزديك داغدى ، داشدى ، دوواردى

هريان گلدى شيلاغ آتيب ، آشارديق

آللاه ، نه خوْش غمسيز-غمسيز ياشارديق

(23)

شيخ الاسلام مُناجاتى دييه ردى

مَشَدرحيم لبّاده نى گييه ردى

مشْدآجلى بوْز باشلارى ييه ردى

بيز خوْشودوق خيرات اوْلسون ، توْى اوْلسون

فرق ائلَمَز ، هر نوْلاجاق ، قوْى اولسون

(24)

ملك نياز ورنديلين سالاردى

آتين چاپوپ قئيقاجيدان چالاردى

قيرقى تكين گديك باشين آلاردى

دوْلائيا قيزلار آچيپ پنجره

پنجره لرده نه گؤزل منظره !

(25)

حيدربابا ، كندين توْيون توتاندا

قيز-گلينلر ، حنا-پيلته ساتاندا

بيگ گلينه دامنان آلما آتاندا

منيم ده اوْ قيزلاروندا گؤزوم وار

عاشيقلارين سازلاريندا سؤزوم وار

(26)

حيدربابا ، بولاخلارين يارپيزى

بوْستانلارين گوْل بَسَرى ، قارپيزى

چرچيلرين آغ ناباتى ، ساققيزى

ايندى ده وار داماغيمدا ، داد وئرر

ايتگين گئدن گوْنلريمدن ياد وئرر

(27)

بايراميدى ، گئجه قوشى اوخوردى

آداخلى قيز ، بيگ جوْرابى توْخوردى

هركس شالين بير باجادان سوْخوردى

آى نه گؤزل قايدادى شال ساللاماق !

بيگ شالينا بايرامليغين باغلاماق !

(28)

شال ايسته ديم منده ائوده آغلاديم

بير شال آليب ، تئز بئليمه باغلاديم

غلام گيله قاشديم ، شالى ساللاديم

فاطمه خالا منه جوراب باغلادى

خان ننه مى يادا ساليب ، آغلادى

(29)

حيدربابا ، ميرزَممدين باخچاسى

باخچالارين تورشا-شيرين آلچاسى

گلينلرين دوْزمه لرى ، طاخچاسى

هى دوْزوْلر گؤزلريمين رفينده

خيمه وورار خاطره لر صفينده

(30)

بايرام اوْلوب ، قيزيل پالچيق اَزَللر

ناققيش ووروب ، اوتاقلارى بَزَلل

رطاخچالارا دوْزمه لرى دوْزللر

قيز-گلينين فندقچاسى ، حناسى

هَوَسله نر آناسى ، قايناناسى

(31)

باكى چى نين سؤزى ، سوْوى ، كاغيذى

اينكلرين بولاماسى ، آغوزى

چرشنبه نين گيردكانى ، مويزى

قيزلار دييه ر : « آتيل ماتيل چرشنبه

آينا تكين بختيم آچيل چرشنبه »

(32)

يومورتانى گؤيچك ، گوللى بوْيارديق

چاققيشديريب ، سينانلارين سوْيارديق

اوْيناماقدان بيرجه مگر دوْيارديق ؟

على منه ياشيل آشيق وئرردى

ارضا منه نوروزگوْلى درردى

(33)

نوْروز على خرمنده وَل سوْرردى

گاهدان يئنوب ، كوْلشلرى كوْرردى

داغدان دا بير چوْبان ايتى هوْرردى

اوندا ، گؤردن ، اولاخ اياخ ساخلادى

داغا باخيب ، قولاخلارين شاخلادى

(34)

آخشام باشى ناخيرينان گلنده

قوْدوخلارى چكيب ، ووراديق بنده

ناخير گئچيب ، گئديب ، يئتنده كنده

حيوانلارى چيلپاق مينيب ، قوْوارديق

سؤز چيخسايدى ، سينه گريب ، سوْوارديق

(35)

ياز گئجه سى چايدا سولار شاريلدار

داش-قَيه لر سئلده آشيب خاريلدار

قارانليقدا قوردون گؤزى پاريلدار

ايتلر ، گؤردوْن ، قوردى سئچيب ، اولاشدى

قورددا ، گؤردوْن ، قالخيب ، گديكدن آشدى

(36)

قيش گئجه سى طؤله لرين اوْتاغى

كتليلرين اوْتوراغى ، ياتاغى

بوخاريدا يانار اوْتون ياناغى

شبچره سى ، گيردكانى ، ايده سى

كنده باسار گوْلوْب - دانيشماق سسى

(37)

شجاع خال اوْغلونون باكى سوْقتى

دامدا قوران سماوارى ، صحبتى

ياديمدادى شسلى قدى ، قامتى

جؤنممه گين توْيى دؤندى ، ياس اوْلدى

ننه قيزين بخت آيناسى كاس اوْلدى

(38)

حيدربابا ، ننه قيزين گؤزلرى

رخشنده نين شيرين-شيرين سؤزلرى

تركى دئديم اوْخوسونلار اؤزلرى

بيلسينلر كى ، آدام گئدر ، آد قالار

ياخشى-پيسدن آغيزدا بير داد قالار

(39)

ياز قاباغى گوْن گوْنئيى دؤيَنده

كند اوشاغى قار گوْلله سين سؤيَنده

كوْركچى لر داغدا كوْرك زوْيَنده

منيم روحوم ، ايله بيلوْن اوْردادور

كهليك كيمين باتيب ، قاليب ، قاردادور

(40)

قارى ننه اوزاداندا ايشينى

گوْن بولوتدا اَييرردى تشينى

قورد قوْجاليب ، چكديرنده ديشينى

سوْرى قالخيب ، دوْلائيدان آشاردى

بايدالارين سوْتى آشيب ، داشاردى

(41)

خجّه سلطان عمّه ديشين قيساردى

ملا باقر عم اوغلى تئز ميساردى

تندير يانيب ، توْسسى ائوى باساردى

چايدانيميز ارسين اوْسته قايناردى

قوْورقاميز ساج ايچينده اوْيناردى

(42)

بوْستان پوْزوب ، گتيررديك آشاغى

دوْلدوريرديق ائوده تاختا-طاباغى

تنديرلرده پيشيررديك قاباغى

اؤزوْن ئييوْب ، توخوملارين چيتدارديق

چوْخ يئمكدن ، لاپ آز قالا چاتدارديق

(43)

ورزغان نان آرموت ساتان گلنده

اوشاقلارين سسى دوْشردى كنده

بيزده بوياننان ائشيديب ، بيلنده

شيللاق آتيب ، بير قيشقريق سالارديق

بوغدا وئريب ، آرموتلاردان آلارديق

(44)

ميرزاتاغى نان گئجه گئتديك چايا

من باخيرام سئلده بوْغولموش آيا

بيردن ايشيق دوْشدى اوْتاى باخچايا

اى واى دئديك قورددى ، قئيتديك قاشديق

هئچ بيلمه ديك نه وقت كوْللوكدن آشديق

(45)

حيدربابا ، آغاجلارون اوجالدى

آمما حئييف ، جوانلارون قوْجالدى

توْخليلارون آريخلييب ، آجالدى

كؤلگه دؤندى ، گوْن باتدى ، قاش قَرَلدى

قوردون گؤزى قارانليقدا بَرَلدى

(46)

ائشيتميشم يانير آللاه چيراغى

داير اوْلوب مسجديزوْن بولاغى

راحت اوْلوب كندين ائوى ، اوشاغى

منصورخانين الي-قوْلى وار اوْلسون

هاردا قالسا ، آللاه اوْنا يار اوْلسون

(47)

حيدربابا ، ملا ابراهيم وار ، يا يوْخ ؟

مكتب آچار ، اوْخور اوشاقلار ، يا يوْخ ؟

خرمن اوْستى مكتبى باغلار ،‌ يا يوْخ ؟

مندن آخوندا يتيررسن سلام

ادبلى بير سلامِ مالاكلام

(48)

خجّه سلطان عمّه گئديب تبريزه

آمما ، نه تبريز ، كى گلممير بيزه

بالام ، دورون قوْياخ گئداخ ائمميزه

آقا اؤلدى ، تو فاقيميز داغيلدى

قوْيون اوْلان ، ياد گئدوْبَن ساغيلدى

(49)

حيدربابا ، دوْنيا يالان دوْنيادى

سليماننان ، نوحدان قالان دوْنيادى

اوغول دوْغان ، درده سالان دوْنيادى

هر كيمسَيه هر نه وئريب ، آليبدى

افلاطوننان بير قورى آد قاليبدى

(50)

حيدربابا ، يار و يولداش دؤندوْلر

بير-بير منى چؤلده قوْيوب ، چؤندوْلر

چشمه لريم ، چيراخلاريم ، سؤندوْلر

يامان يئرده گؤن دؤندى ، آخشام اوْلدى

دوْنيا منه خرابه شام اوْلدى

(51)

عم اوْغلينان گئدن گئجه قيپچاغا

آى كى چيخدى ، آتلار گلدى اوْيناغا

ديرماشيرديق ، داغلان آشيرديق داغا

مش ممى خان گؤى آتينى اوْيناتدى

تفنگينى آشيردى ، شاققيلداتدى

(52)

حيدربابا ، قره كوْلون دره سى

خشگنابين يوْلى ، بندى ، بره سى

اوْردا دوْشَر چيل كهليگين فره سى

اوْردان گئچر يوردوموزون اؤزوْنه

بيزده گئچك يوردوموزون سؤزوْنه

(53)

خشگنابى يامان گوْنه كيم ساليب ؟

سيدلردن كيم قيريليب ، كيم قاليب ؟

آميرغفار دام-داشينى كيم آليب ؟

بولاخ گنه گليب ، گؤلى دوْلدورور ؟

ياقورويوب ، باخچالارى سوْلدورور ؟

(54)

آمير غفار سيدلرين تاجييدى

شاهلار شكار ائتمه سى قيقاجييدى

مَرده شيرين ، نامرده چوْخ آجييدى

مظلوملارين حقّى اوْسته اَسَردى

ظالم لرى قيليش تكين كَسَردى

(55)

مير مصطفا دايى ، اوجابوْى بابا

هيكللى ،ساققاللى ، توْلستوْى بابا

ائيلردى ياس مجلسينى توْى بابا

خشگنابين آبروسى ، اَردَمى

مسجدلرين ، مجلسلرين گؤركَمى

(56)

مجدالسّادات گوْلردى باغلاركيمى

گوْروْلدردى بولوتلى داغلاركيمى

سؤز آغزيندا اريردى ياغلاركيمى

آلنى آچيق ، ياخشى درين قاناردى

ياشيل گؤزلر چيراغ تكين ياناردى

(57)

منيم آتام سفره لى بير كيشييدى

ائل اليندن توتماق اوْنون ايشييدى

گؤزللرين آخره قالميشييدى

اوْننان سوْرا دؤنرگه لر دؤنوْبلر

محبّتين چيراخلارى سؤنوْبلر

(58)

ميرصالحين دلى سوْلوق ائتمه سى

مير عزيزين شيرين شاخسِى گئتمه سى

ميرممّدين قورولماسى ، بيتمه سى

ايندى دئسك ، احوالاتدى ، ناغيلدى

گئچدى ، گئتدى ، ايتدى ، باتدى ، داغيلدى

(59)

مير عبدوْلوْن آيناداقاش ياخماسى

جؤجيلريندن قاشينين آخماسى

بوْيلانماسى ، دام-دوواردان باخماسى

شاه عبّاسين دوْربوْنى ، يادش بخير !

خشگنابين خوْش گوْنى ، يادش بخير !

(60)

ستاره عمّه نزيك لرى ياپاردى

ميرقادر ده ، هر دم بيرين قاپاردى

قاپيپ ، يئيوْب ، دايچاتكين چاپاردى

گوْلمه ليدى اوْنون نزيك قاپپاسى

عمّه مينده ارسينينين شاپپاسى

(61)

حيدربابا ، آمير حيدر نئينيوْر ؟

يقين گنه سماوارى قئينيوْر

داى قوْجاليب ، آلت انگينن چئينيوْر

قولاخ باتيب ، گؤزى گيريب قاشينا

يازيق عمّه ، هاوا گليب باشينا

(62)

خانم عمّه ميرعبدوْلوْن سؤزوْنى

ائشيدنده ، ايه ر آغز-گؤزوْنى

مَلْكامِدا وئرر اوْنون اؤزوْنى

دعوالارين شوخلوغيلان قاتاللار

اتى يئيوْب ، باشى آتيب ، ياتاللار

(63)

فضّه خانم خشگنابين گوْلييدى

آميريحيا عمقزينون قولييدى

رُخساره آرتيستيدى ، سؤگوْلييدى

سيّد حسين ، مير صالحى يانسيلار

آميرجعفر غيرتلى دير ، قان سالار

(64)

سحر تئزدن ناخيرچيلار گَلَردى

قوْيون-قوزى دام باجادا مَلَردى

عمّه جانيم كؤرپه لرين بَلَردى

تنديرلرين قوْزاناردى توْسيسى

چؤركلرين گؤزل اييى ، ايسيسى

(65)

گؤيرچينلر دسته قالخيب ، اوچاللار

گوْن ساچاندا ، قيزيل پرده آچاللار

قيزيل پرده آچيب ، ييغيب ، قاچاللار

گوْن اوجاليب ، آرتارداغين جلالى

طبيعتين جوانلانار جمالى

(66)

حيدربابا ، قارلى داغلار آشاندا

گئجه كروان يوْلون آزيب ، چاشاندا

من هارداسام ، تهراندا يا كاشاندا

اوزاقلاردان گؤزوم سئچر اوْنلارى

خيال گليب ، آشيب ، گئچر اوْنلارى

(67)

بير چيخئيديم دام قيه نين داشينا

بير باخئيديم گئچميشينه ، ياشينا

بير گورئيديم نه لر گلميش باشينا

منده اْونون قارلاريلان آغلارديم

قيش دوْندوران اوْركلرى داغلارديم

(68)

حيدربابا ، گوْل غنچه سى خنداندى

آمما حئيف ، اوْرك غذاسى قاندى

زندگانليق بير قارانليق زينداندى

بو زيندانين دربچه سين آچان يوْخ

بو دارليقدان بيرقورتولوب ، قاچان يوْخ

(69)

حيدربابا گؤيلر بوْتوْن دوماندى

گونلريميز بير-بيريندن ياماندى

بير-بيروْزدن آيريلمايون ، آماندى

ياخشيليغى اليميزدن آليبلار

ياخشى بيزى يامان گوْنه ساليبلار

(70)

بير سوْروشون بو قارقينميش فلكدن

نه ايستيوْر بو قوردوغى كلكدن ؟

دينه گئچيرت اولدوزلارى الكدن

قوْى تؤكوْلسوْن ، بو يئر اوْزى داغيلسين

بو شيطانليق قورقوسى بير ييغيلسين

(71)

بير اوچئيديم بو چيرپينان يئلينن

باغلاشئيديم داغدان آشان سئلينن

آغلاشئيديم اوزاق دوْشَن ائلينن

بير گؤرئيديم آيريليغى كيم سالدى

اؤلكه ميزده كيم قيريلدى ، كيم قالدى

(72)

من سنون تك داغا سالديم نَفَسى

سنده قئيتر ، گوْيلره سال بوسَسى

بايقوشوندا دار اوْلماسين قفسى

بوردا بير شئر داردا قاليب ، باغيرير

مروّت سيز انسانلارى چاغيرير

(73)

حيدربابا ، غيرت قانون قايناركن

قره قوشلار سنَّن قوْپوپ ، قالخاركن

اوْ سيلديريم داشلارينان اوْيناركن

قوْزان ، منيم همّتيمى اوْردا گؤر

اوردان اَييل ، قامتيمى داردا گؤر

(74)

حيدربابا . گئجه دورنا گئچنده

كوْراوْغلونون گؤزى قارا سئچنده

قير آتينى مينيب ، كسيب ، بيچنده

منده بوردان تئز مطلبه چاتمارام

ايوز گليب ، چاتميونجان ياتمارام(75)

حيدربابا ، مرد اوْغوللار دوْغگينان

نامردلرين بورونلارين اوْغگينان

گديكلرده قوردلارى توت ، بوْغگينان

قوْى قوزولار آيين-شايين اوْتلاسين

قوْيونلارون قويروقلارين قاتلاسين

(76)

حيدربابا ، سنوْن گؤيلوْن شاد اوْلسون

دوْنيا واركن ، آغزون دوْلى داد اوْلسون

سنَّن گئچن تانيش اوْلسون ، ياد اوْلسون

دينه منيم شاعر اوْغلوم شهريار

بير عمر دوْر غم اوْستوْنه غم قالار

 

(۱) حيدربابا گلديم سنى يوخليام
بير ده ياتام قوجاغوندا يوخليام
عمرى قوام بلكه بوردا حاخليام
اوشاقليغا ديم بيزه گلسن بير
ايدين گونلر آغلار يوزه گلسن بير

(۲) حيدربابا چكدون منى گتيردون
يوردوموزا، يواميزا يتيردون
يوسفوى اوشاق ايكن ايتيردون
قوجا يعقوب ايتميشسمده تاپوپسان
قاواليوب قورد آغزينان قاپوپسان

(۳) گدنلرين يرى بوردا، گورونور
خانم ننم آغ كقنين بورونور
داليمجادور، هارا گديم سورونور
بالا گلدون؟ نيه بله گژ گلدون
صبريم سنن گلشدى سن گوژ گلدون

(۴) من گوردوگوم كروان چاتوپ كچپدى
آيريليغن شربتنى ايچيپدى
عمرموزون كچى بوردان گچيپدى
گچيپ گديپ گدر گلمز يولارا
توزى قونوپ بو داشلارا كولارا

(۵) بوردا شيرين خاطرهلر ياتوپلار
داشلاريلان باشى باشا چاتوپلار
آشناليغين داشين بيزدن آتوپلار
من باخاندا قاوزايلار باخيلار
بيرده ياتوپ ياندريلار ياخيلار

(۶) قبيله ميز بوردا قوروپ اجاغى
ايندى اولموش قورد قوشلارون ياتاغى
گون باتاندا سونر بوتون چراغى
و بلدة ليس لها انيس
الا اليعافير و الا العيس

(۷) زمان گچير افق لرده توز قالير
كروان كيمى اوزاقلاردا توز سالير
دومان گلير يوركلرى چولقلير
يورك دير زمان كچمه، آمان دور
كچنلرده گوزوم وار بير داياندور

(۸) روزگارين دگرمانى فيرلانير
مخلوق اونون ديشلرينه تولانير
باخ كه گنه بشر نجه آلانير
هميشه ليك شادليق اومور اوزينه
قبرى گورور توز قوندورمور يوزينه

(۹) كهنه لرين سور سموكى دارتلوپ
قورتولانون چول چوخاسى يرتلوپ
ملا ابراهيم لاپ اريوب قورتلوپ
شيخ الاسلام سهمان قالوپ قبراخدى
نوروز على قاچاق گچيپ قوچاخدى

(۱۰) عاهيلارون يتمش كفن چورودوپ
جاهيلارى دنيا غمى كريدوپ
قيز گلينلر ات جانلارى اريدوپ
رخشندهنين نوه دوتور الينى
ننه قذين كوركنى گلينى

(۱۱) چوق شكرى وار، گنه گلدوخ گوروشدوخ
ايتنلردن بيتنلردن سوروشدوخ
كوسموشدوخدا آلله قويسا باريشدوخ
بيرده گوروش قسمت اولا، اولميه
عمرلرده فرصت اولا، اولميه

(۱۲) بوردا خيال ميدانلارى گنيشدى
داغلار داشلار بوتون منله تانيشدى
گورجك منى حيدربابا دانيشدى
بو نه سسدر سن عالمه سالوپسان
گل بير گورك اوزون هاردا قالوپسان

(۱۳) كجاويله بو چايدان چوق گچميشيك
بو چشمهلردن نه سولار ايچميشيك
بو يونجاليقلاردا كسوب بيچميشيك
چپيشلرى قيديخليان گونلريم
چپيش گيمى اويناخليان گونلريم

(۱۴) بو خرمنده آرادان خير اوينارديخ
جومالاشوب قاريشقا تك قاينارديخ
يواش يواش باخچالارا آغنارديخ
آغاجلاردان چلينك آغاج كسرديك
قوروخجونون قورخوسوندان اسرديك

(۱۵) بو طوله ده سارى اينك دوغاردى
خانم نم اينكلرى ساغاردى
آنا ايسى دام ديواردان ياغاردى
من بزوى قوجاقلارديم قاشماسين
ديردى باخ بايدا دولسين داشماسين

(۱۶) بو داملاردا چوخلى جزيخ آتمشام
اوشاقلارين آشيقلارين اوتمشام
قورقوشوملى سقه آلوپ ساتمشام
اوشاق نجه هيچ زادينان شاد اولار
ايندى بيزيم غمى دوتمور دنيالار

(۱۷) مكتب قالير اوشاقلار درس آليلار
هى يازيلار هىپوزيلار، ياليلار
ملا ابراهيم اوزى اوى قاليلار
آما بيزيم يولداشلاردان قالان يوق
بونلاردان بير بيزى يادا سالان يوق

(۱۸) بير وقتينده بو مكتب پرگار ايدى
بير مسيب بير ممدسن وار ايدى
بيرى خلفه، بيرى ورزشكار ايدى
آخود بيزله اويناماغا گدردى
ازى بيزه اويناماق ارگدردى

(۱۹) دديم بالام او مدسن نولوپدى
معلوم اولدى طفيل جوان الوپدى
نه وار نه وار، بورنونان قان گلوپدى
بير يل اسير باخيرسان ممدسن يوق
بو كتده بير بورون قانين كسن يوق

(۲۰) ديم ديون مسيبه نه گكدى
غلام گوردوم آغلار گوزيله گلدى
دى اودا بهاليق دوشدى الدى
ديم يازيق بيزله حاسل بلنلر
بيتمينده آجلارينان النلر

(۲۱) بو مكتبده شعرين شهدين دادمشام
آخوندون آغزيندان قاپوپ اودمشام
گاهداندا بير آخوندى آلادمشام
باشيم آغرير ديوپ قاچوپ گتميشم
باخچالاردا گدوب گوزدن ايتميشم

(۲۲) آزاد اولاندا مكتبرن چخارديخ
هجوم وروپ بيرىبرين سخارديخ
يولدا هر نه گلدى وروب يخارديخ
اوشاق ديمه ايپين قرميش دانا ده
بير دانادا ديمه اللى دانا ده

(۲۳) ملك نياز ايتگين گدوپ يوخ اولوب
امير اصلان سكته ايله يخلوب
هره قاچوپ بير دره ده سيخلوب
چرك غمى چيخوپ خلقين آينا
هر كس قالوب اوز جاننين هاينا

(۲۴) كتدى يازيق چراغ تاپير يانديرا
گوروم سيزون برقوز قالسين آندرا
كيم بو سوزى اربابلارا قاندرا
نه دور آخر بو ملتين گناهى
دوتسون سيزى گوروم مظلوملار آهى

(۲۵) هر نه آلير بها ورير قيمتى
اوجوز فقط اكينچينون زحمتى
بيتندن آرتيق بيچنون اجرتى
كند اوشاقى گدير يولدا ايشليه
اوردا بلكه قندى باپا ديشليه

(۲۶) كتدى گلين كيمى دنيانى بزر
اوز عورتى ياماخ ياماغه دزر
ايگنه بزر خلقى ازى لوت گزر
اينديده وار چرشابلارى آلباخدى
اوشاكلارون قيش پاچاسى چلپاخدى

(۲۷) بو باخچادا آش ترهسى اكرديك
هى سو آچوپ كرديه گوز تكرديك
چيقماق همين دريپ آشا تكرديك
فينقلشلار قاشيقلاردان آسلانى
ياغلى ديسم قورى آغزون ايسلانى

(۲۸) بو دشلرده قوزيلارى يايارديخ
آخماسونلار اولدز تكين سايارديخ
قوش قوانى چكوب داشا دايارديخ
قوش قوان دا ايله بيل كه قاباندى
قورد اوزاقدان دير بس كه چوباندى

(۲۹) خانم ننم ناخوش اولان ايليدى
قيش وار ايكن گولگيدى، يليدى
قيشدا چيقدى ياغيشيدى سليدى
يوك ياپنى هى چاتيردوخ كه گداخ
سل چيمخروب، مجبوريدوخ قيداخ

(۳۰) نيسان دوشدى بيزده دوشدوخ ياغيشا
كيم باجارا سيللريله بوغيشا
هى ديردوخ بلكه ياغيش يغيشا
بالا كيشى فايطونچميز گلميشدى
اماميه قهوهسنده قاكميشدى

(۳۱) بو زميده گدوپ گوزدن اترديك
تونقال قوروپ ستلرى اترديك
ديوپ گولمك مرادينه يترديك
ايلده گولسون، مرادينه يتشسون
يوركلرين يارالارى بتشسون

(۳۲) خلورچيلر بوردا خلور داشيردى
بو كولوكدن الاخلار ديرماشيردى
سلر كيمى، نعمت آشوپ داشيردى
هر ايش دييدون هر كيمه گورردى
جان درمانى ايستييدون وردى

(۳۳) ايندى بشر آج قورد تكين اودوخوپ
چمبلنتى، گوز قجردوپ، دوروخوپ
باخيلار كه گورسونر كيم سينخوپ
توكولسنلر اونون لشين يرتسونلار
هره بر ديش انسه سيندن قيرتسونلار

(۳۴) حيدربابا سنده دفينهلر وار
داغلار وديعهسى، خزينهلر وار
آما سنه بنزرده سينه لر وار
بو سينه لر داغلاريله دانشور
داغلار كيمى گوگلريله قونشور

(۳۵) گور هاردان من سنه سالديم نفسى
دديم قيتر سال عالمه بو سسى
سنده ياخشى سيمرغ ايتدون مگسى
سان كه قاناد وردون يله نسمه
هر طرفدن سس وردلر سسمه

(۳۶) حيدربابا سنى وطن بيلميشديم
وطن ديوب باش گتوروپ گلميشديم
سنى گوروب گوزياشيمى سيلميشديم
حلبو كه لاپ غملى غربت سنديميش
قارا زندان، آجى شربت سنديميش

(۳۷) كيم قالدى كه بذه بوغون بورمادى
آتدان آتدان بزه كلك قورمادى
بير مرد اوغول بزه هاوار دورمادى
شيطانلارى قوجاقليوب گزديز سيز
انسانلارى اياخليوب ازديز سيز

(۳۸) ديوار اوجالدى گون بيزه دوشمدى
زندان قارالدى گوز گوزى سشمدى
گوندوز گوزى منيم لامپام گشمدى
سلده باسدى امز دولوپ گول اولدى
چوق يازيغين اوى چونوپ چول اولدى

(۳۹) اول باشى مندن استقبال ايتديز
سونان چونوب ايشيمده اخلال ايتديز
اوز ظنوزجه استادى اغفال ايتديز
عيبى يوقدور كچر گدر عمردور
قيشدا چيقار، يوزى قارا كمردور

(۴۰) منيم يولوم محبت جاده سيدى
سون سوزلريم حقون ارادهسيدى
محبتون، رسالت وعده سيرى
يوقسا منده بير كسيله قرض يوق
سياست آدلى منده بير مرض يوق

(۴۱) حق نه ديور؟ كفره قارشى گتميوز
نوردان چيقوب ظلمات ايچره ايتميوز
فريلداغا فرفرا تك بتميوز
گوردوزده كه اولمادى كفرين ديبى
پولدا ورسه آلماغا تيكميش جيبى

(۴۲) شيطان بيزيم قبله ميزى چوندريب
آلله دين يولدان بيزى دوندريب
ايلانلى چشمه يه بيزى گندريب
منت قويور كه آرخوز نهر اولوب
بيز گوروروك سولار بيزه زهر اولوب

(۴۳) حيدربابا گليليخ دان نه چيقار
ظامون اوين صبر و تحمل يخار
درويش اولان صبرون الين برك سيخار
گل قيداخ چيقاق آقا دوزينه
گچاق گنه محبتون سوزينه

(۴۴) دينه اوشاق بيربريله ساذ اولسون
بلكه بو قيش برده چونوب ياز اولسون
چاى چمنلر، اردك اولسون غز اولسون
بيزده باخوب فرحلنوب بير اوچاق
سنيق سالخاخ قانادلارى بير آچاق

(۴۵) بو باخچادان آلچالارى دررديك
قيش آدينا چيقوب دامدا سررديك
هى ده چيقوپ يالانان چوندررديك
قيش زومارين يايدا ييوب دويارديق
بير كلى ده منت خلقه قويارديق

(۴۶) اولر قالير اوصاحبى يوق اوزى
اجاقلارين آنجاق ايشيلدير گوزى
گدنلرين چوق قليپدور سوزى
بيزدنده بير سوز قالاجاق آى آمان
كيملر بيزدن سالاجاق آى آمان

(۴۷) بيزدن سورا كرسيلرين تويندا
كندين ناغيلاريندا سوز سويندا
قار ننهنين چاخماغيندا قويندا
حيدربابا ازين قاتار سوزلره
ايشگى كيمى خمار ورر گوزلره

(۴۸) عاشيق دير بير نازلى يار واريميش
عشقيندن اودلانوب يانار واريميش
بير سازلى، سوزلى شهريار واريميش
اودلار سونوب اونون اودى سونميوپ
فلك چونوپ اونون چرخى چونميوپ

(۴۹) حيدربابا آلچاقلارون كشگ اولسون
بيزدن سورا قالانلارا عشق اولسون
كشمشلرون گلنلره مشق اولسون
اولاديميز مزهبنى دانماسون
هر ايچى بوش سوزلره آلدنماسون

آتــــــــــــا شهريار

 

 

 

آردینی اوخو